மானமும், தானமும், ஞானமும், வானமும்- திருவாழ்கொளிபுத்தூர் தேவாரங்கள்

 தமிழ்த்தாத்தா உ.வே.சா அவர்களின் ஆசானான திரிசிரபுரம்.மஹாவித்துவான்.மீனாட்சிசுந்தரம் பிள்ளை அவர்களின் ஒரு பாடலோடு இந்த பதிவைப்பார்ப்போம்.

மீனாட்சிசுந்தரம் பிள்ளை தான் கந்தர் சஷ்டி கவசம் இயற்றிய தேவராய சுவாமிகளுக்கும் தமிழ் ஆசான். அன்றைய நாளில் மாயூரம் உட்பட பல சிவாலயங்களுக்கு இவர் புராணம் இயற்றியுள்ளார்.

கீழேக்காணும் இந்தப்பாடல் திருவாளொளி புற்றூர் புராணத்தில் இருக்கிறது.

பரிப்பவன் பரிக்கும் போதும் -. அதென்ன பரிப்பவன்? 

இப்போது தான் பாரதம் ஒரு தேர்தலைச் சந்தித்திருக்கிறது. பரதன் என்ற சொல்லுக்குத் தாங்குபவன் என்பது ஒரு பொருளாகும்.  

இந்த செய்யுளில் உள்ள பரிப்பவன் என்ற சொல்லுக்கு, காப்பாற்றுபவன் தாங்குபவன் என்பது பொருள். பரிப்பவன்-காப்பாற்றுபவன். பறிப்பவன் அல்ல. 

தமிழ் இருநூற்றண்டுகளில் எத்தனை சொற்களை இழந்திருக்கிறது என்பதை இதுபோன்ற பாடல்களைக்கொண்டு அறியலாம். 

மும்மூர்த்திகளுக்கும் அவரவருக்கான வேலைகள் இருக்கின்றன. ஒருவர் படைக்கிறார், ஒருவர் பரிக்கிறார்-காப்பாற்றுகிறார், மற்றவர் துடைக்கிறார்-நம் வாழ்க்கையை முடித்துவைக்கிறார். இந்த மூன்று தொழில்கள் நடக்கிறபடி நடக்கட்டும். நாம் இந்த மூன்றின்போதும், நல்ல நறுமணம் கமழுமாறு செய்து, துதிகள் பாடி, தேங்காய் உடைக்கும்போது அந்த ஊற்றை உற்றவனும், நம்முடைய பிறப்பு, இறப்பு என்னும் சுழற்சிக்கான வாயிலை அடைப்பவனுமாகிய சித்தி விநாயகரை எண்ணுவோம் என்கிறார் மீனாட்சி சுந்தரம் பிள்ளை என்று நான் புரிந்துகொண்டேன். 

தேங்காய் உடைப்பது என்பது நம்முடைய துன்பங்களிலிருந்து நமக்கு விடுதலை வேண்டும் என்பதற்காக விநாயகருக்குச் செய்யும் பிரார்த்தனை. பிறவி என்ற துன்பத்தைப்போக்க, அவரைப்பற்றிக்கொள்வோம். 

இணையத்தில் எங்கும் மேலே சொன்னப்பாடலுக்கு விளக்கம் இல்லை. 

திருவாள் ஒளி புற்றூர் :

காவிரி வடகரையில் பாடல் பெற்ற 29ஆவது தலம். வைத்தீஸ்வரன் கோயில் அருகே இருக்கிறது.

வாசுகி என்னும் பாம்பு பாற்கடலைக்கடைந்த பிறகு தன் உடல் வேதனைத்தீர வேண்டிக்கொண்டத் திருத்தலம்- அதனால் புற்றூர்.

அர்ச்சுனன் கானகவாசம் செய்தபோது தண்ணீர் தேடி இங்கு வந்த போது, ஒரு முதியவர் உருவத்தில் வந்த சிவபெருமான், அர்ச்சுனனின் வாளை வாங்கிக்கொண்டு ஒரு கோலைக்கொடுத்து . அதை அங்கிருந்த இடத்தில் தட்டிப்பார்த்து நீர் இருக்கும் இடத்தை அறிந்துக்கொள்ளச் சொன்னார்.

முதியவர் மறைந்துவிட்டார்.

தண்ணீர் கிடைத்த இடத்தில் ஒரு புற்றும் அந்த புற்றுக்குள் ஒரு லிங்கமும் இருந்ததாகவும், அர்ச்சுனனின் வாள் அந்த புற்றுக்குள் ஒளி மிகுந்து காணப்பட்டதாகவும் தலபுராணம் சொல்கிறது.

இந்த தலத்திற்கு சம்பந்தரின் தேவாரமும், சுந்தரரின் தேவாரமும் அழகு சேர்க்கின்றன.

சுந்தரரின் தேவாரத்தில் அவர் மண்ணி ஆற்றைப்பற்றியும் குறிப்பிடுகிறார் .

  குடமுனி கரத்தில் ஏந்துங் குண்டிகை இருந்து நீங்கிப்

படிதனில் வேறு வேறாய்ப் பற்பல நாமந் தாங்கிக்

கடல்கிளர்ந் தென்னச் செல்லுங் காவிரி யென்னு மாற்றின்

வடகரை மண்ணி யின்பால் வந்தனன் கருணை வள்ளல்! (கந்தபுராணம் )

கந்தபுராணம் அகத்தியரின் குண்டலத்திலிருந்து வந்து , பலப்பல பெயர்களோடு, கடல்போலத் திகழும் காவிரியின் வடகரையில் உள்ள மண்ணி என்னும் ஆற்றுக்குக் கந்தன் வந்ததாகச் சொல்கிறது. 

தமிழ்க்கடவுள் வந்த இடம் என்றால், இந்த இடத்தின் பழமைக்கும் மாட்சிக்கும் வேறு ஏதேனும் சொல்ல அவசியம் இல்லை. 

மண்ணுதல் என்ற சொல்லுக்கு கழுவுதல் என்றும் பொருள் இருக்கிறது.

நம்முடைய தீவினைகளைக்கழுவும் வகையில் இந்த தலத்தில் மண்ணி ஆறு பரவியிருக்கிறது. 

மண்ணி ஆற்றின் மலர் நீலோத்பவம். சோழநாட்டில் நீர்வளம் உள்ள இடங்களில் எல்லாம் இந்த மலரைப்பார்க்கலாம். இந்த மலர் இலங்கை நாட்டின்தேசிய  மலரும் கூட. 

படைக்கண் சூலம் பயில வல்லானை, பாவிப்பார் மனம் பாவிக் கொண்டானை,

கடைக்கண் பிச்சைக்கு இச்சை காதலித்தானை, காமன் ஆகம்தனைக் கட்டு    அழித்தானை,

சடைக்கண் கங்கையைத் தாழ வைத்தானை, தண்ணீர்மண்ணிக் கரையானை, தக்கானை,

மடைக்கண் நீலம் மலர் வாழ்கொளி புத்தூர் மாணிக்கத்தை, -மறந்து என் நினைக்கேனே? . (7.57 திருவாழ்கொளிபுத்தூர்)

இன்றைய நாளில் வாள் ஒளி புற்றூர் மருவி திருவாழ்கொளிப்புத்தூர் என்று வழங்கப்படுகிறது.

படைக்கண் சூலம் பயில வல்லானை- தன் கரங்களில் தங்கியுள்ள படைக்கருவிகளில் சூலம் என்ற ஒன்றைப்பழக வல்லவனும்

பாவிப்பார் மனம் பாவிக் கொண்டானை- இந்த வரியைப்பாருங்கள். இதே போல பாவிப்பார், மனம் பாவிப்பானை என்று திருக்கச்சி ஏகம்பத்தின் தேவாரத்தில், தனக்கு இடக்கண் கிடைத்தபோதும் சுந்தரமூர்த்தி சுவாமிகள் பாடியிருக்கிறார். 

அந்த தேவாரத்தைக்கீழே காணலாம் 

உற்றவர்க்கு உதவும் பெருமானை, ஊர்வது ஒன்று உடையான், உம்பர் கோனை,

பற்றினார்க்கு என்றும் பற்றவன் தன்னை, பாவிப்பார் மனம் பாவிக் கொண்டானை,

அற்றம் இல் புகழாள் உமை நங்கை ஆதரித்து வழிபடப் பெற்ற

கற்றை வார் சடைக் கம்பன் எம்மானை, காணக் கண் அடியேன் பெற்ற ஆறே! . (கச்சி ஏகம்பம்-சுந்தரர் தேவாரம்) 

பாவிப்பார் மனம் பாவிக் கொண்டானை-தன்னை மனதில் பாவிப்பவர்களின் மனதில் பரவி, அதைத்தன் அகமாகக்கொள்வார் சிவபெருமான் 

கடைக்கண் பிச்சைக்கு இச்சை காதலித்தானை-விரும்பி, மனதில் கர்வமேதுமின்றி, மண்டையோட்டுத்தலையில் பிச்சை வாங்குகிறார் சிவபெருமான்.

நம்மில் பலபேருக்கு செய்யும் தொழிலைப்பற்றிய கர்வம் இருக்கிறது. ஆன்மீக முன்னேற்றம் வேண்டுவோருக்கு இருக்க வேண்டிய மற்றொரு குணம் கர்வம் துறத்தல் என்பதையும் சிந்திப்போம். 

காமன் ஆகம்தனைக் கட்டு    அழித்தானை-உடலழகு மீது கர்வம் கொண்ட மன்மதனை உடல் அழியச் செய்தார். 

ஒரே அடியில் கர்வமில்லாத சிவபெருமானையும், கர்வம் கொண்ட மன்மதனையும் சொன்னது சிறப்பு !

சடைக்கண் கங்கையைத் தாழ வைத்தானை-கங்கையைச்  சடையில் அது அங்கிருந்து உலகுக்கு வரும்படி தாழ  வைத்தவனும் 

தண்ணீர்மண்ணிக் கரையானை-

கங்கையைச்  சொன்ன அதே அடியில் மண்ணி ஆற்றையும் சொல்கிறார் சுந்தரர்.

 தண்ணீர்-குளிர்ந்த நீரை உடைய மண்ணி ஆற்றின் கரையில் அமர்ந்திருக்கிறார் சிவபெருமான் 

தக்கானை- எல்லாத் தகுதிகளும் உடையவனை  (Ultimate Fit)

மடைக்கண் நீலம் மலர் வாழ்கொளி புத்தூர் மாணிக்கத்தை-நீர்மடைகளில் நீலோத்பவ  மலர் மலர்கின்ற திருவாழ்கொளி புத்தூரில் எழுந்தருளியிருக்கின்ற மாணிக்கம் போன்ற  பெருமானை

மறந்து என் நினைக்கேனே? மறந்து வேறொன்றையும் நினைக்க முடியாது.

தக்கேசி எனப்படும் பண்ணில் அமைந்த இந்த பாடல், எப்படி சிவபெருமானை மறக்க முடியும் என்ற பொருளில் அமைந்ததாக இருக்கிறது. 

திருஞானசம்பந்தர் தன்னுடைய இளம்வயதில் முக்தி அடையப்பெற்றவர். அவருடைய திருவாழ்கொளிபுத்தூர் தேவாரம் பாடல் அமைந்த விதத்தில் வித்யாசமாக இருக்கிறது.

ஓராயிரம் பாடலிலே உன் பாடலை நான் அறிவேன், ஆயிரம் மலர்களே போன்ற பல திரையிசைப்பாடல்களில் ஆயிரம் என்ற சொல் மீண்டும் மீண்டும் வருவதைப்பார்க்கலாம். இந்த தேவாரத்தில், ஆயிரம் என்ற சொல் சிவபெருமானுக்கு அடைமொழியாக பல இடங்களில் பயன்படுத்தப்பட்டுள்ளது. 

எண்ணில் ஈரமும் உடையார்; எத்தனையோ இவர் அறங்கள்

கண்ணும் ஆயிரம் உடையார்; கையும் ஓர் ஆயிரம்

                                                       உடையார்;

பெண்ணும் ஆயிரம் உடையார்; பெருமை ஓர் ஆயிரம்

                                                       உடையார்;

வண்ணம் ஆயிரம் உடையார் வாழ் கொளிபுத்தூர் உளாரே

எண்ணில் ஈரமும் உடையார்:மனதில் இரக்கம் மிகுந்தவர் சிவபெருமான். தொண்டர்களின் மனக்கவலைகளுக்கு இறங்குபவர். 

எத்தனையோ இவர் அறங்கள்-அவர் பல அறச்செயல்கள் செய்பவர். 

கண்ணும் ஆயிரம் உடையார்; கையும் ஓர் ஆயிரம்

                                                       உடையார்

கண்களும், கரங்களும் ஆயிரம் உடையவர். எத்தனைக்கோடி உயிரினங்களையும் காப்பாற்றுபவர் என்பதால், அவருக்கு ஆயிரம் கண்களும், கரங்களும் தேவை தானே. 

பெண்ணும் ஆயிரம் உடையார்-

ஆயிரம் பெண்களைக்கொண்டவர் என்று பொருள் கொள்ளக்கூடாது. ஆற்றல் என்பது பெண்வடிவம். சிவனும் சக்தியும் ஒன்றே என்பதால், ஆயிரம் விதமான ஆற்றல்களைக்கொண்டவர்.

பெருமை ஓர் ஆயிரம்

                                                       உடையார்-

 தன்னுடைய இயல்பின் மூலமாகவும், செயல்களின் மூலமாகவும், ஆயிரம் பெருமை உடையவர். 

வண்ணம் ஆயிரம் உடையார் வாழ் கொளிபுத்தூர் உளாரே

ஆயிரம் வண்ணம் கொண்டவர்- திருவாழ்கொளிபுதூரில் வாழும் சிவபெருமான் .

அதே தேவாரத்தில் உள்ள இன்னும் இரண்டு பாடல்களை இந்த பதிவில் பார்ப்போம்.

பரவுவாரையும் உடையார்; பழித்து இகழ்வாரையும்

                                                      உடையார்;

விரவுவாரையும் உடையார்; வெண் தலைப் பலி கொள்வது

                                                      உடையார்;

அரவம் பூண்பதும் உடையார்; ஆயிரம் பேர் மிக

                                                      உடையார்;

வரவும் ஆயிரம் உடையார் வாழ்கொளிபுத்தூர் உளாரே

பரவுவாரையும் உடையார்-பரவுவார்- புகழ்வோரையும் தன்னுடையவர்களாக நினைப்பவர் சிவபெருமான். இது பெரும்பாலான மக்களின் இயல்பு. தங்களுக்கு வாழ்க வாழ்க என்று புகழ்பவர்களை எல்லாருக்கும் பிடிக்கும்.

ஆனால், 

பழித்து இகழ்வாரையும்   உடையார்- தன்னை இகழ்ந்து பேசுபவர்களை வெறுக்காது அவர்களையும் தன்னுடையவர்களாக நினைப்பவர் சிவபெருமான். விருப்பு, வெறுப்பு போன்ற குணநலன்களைக்கடந்தவர். 

விரவுவாரையும் உடையார்-

பரவுவார்

இமையோர்கள்... விரவுவார் மெய்யன்பின் அடியார்கள்’ என்கிறது திருவாசகம்

உண்மையான அன்போடு, கூடி இறைவனில் கலக்கும் அளவுக்கு அன்புடைய தொண்டர்களையும் உடையவர்.

வெண் தலைப் பலி கொள்வது

                                                      உடையார்,அரவம் பூண்பதும் உடையார்-பிரம்மனின் தலையோட்டில் பலி தேர்பவர்;பாம்புகளை அணிந்திருக்கிறார் 

ஆயிரம் பேர் மிக   உடையார்-ஆயிரம் பேர் கொண்டவர்

வரவும் ஆயிரம் உடையார்-வரமும் ஆயிரம் உடையார்

வாழ்கொளிபுத்தூர் உளாரே

சிவபெருமான் யாரிடமும்  வரவு எதிர்பார்க்கவில்லை. அவர் நமக்கு ஆயிரம் வரங்கள் அருள்பவர். அவர் வாழ்கொளிபுத்தூரில் உள்ளவர்.

ஒவ்வொரு மனிதரும் வெவ்வேறு படிநிலைகளைக்கடந்து வாழ்கிறோம். இருபது வயதுத்துடிப்பில், மானம் பெரிதாகத்தோன்றும். கொஞ்சம் முதிர்ச்சி வந்தபிறகு, தானம் செய்வது மனதுக்கு அமைதி அளிப்பதாக நினைக்கிறோம். பிறகு ஞானத்தை நோக்கிய தேடலுக்கு நகர விழைகிறோம். முடிவாக வானுலகம் நோக்கிப்பயணிக்கிறோம். 

இந்த எல்லா வாழ்க்கையையும் உடையவர் சிவபெருமான்.

அவருக்கு நம்மைப்புரியும் என்பதான ஆறுதலைத்தருகிறது இந்தப்பாடல் .

மான வாழ்க்கைய துடையார்

     மலைந்தவர் மதிற்பரி சறுத்தார்

தான வாழ்க்கைய துடையார்

     தவத்தொடு நாம்புகழ்ந் தேத்த

ஞான வாழ்க்கைய துடிடயார்

     நள்ளிருண் மகளிர்நின் றேத்த

வான வாழ்க்கையை துடையார்

     வாழ்கொளி புத்தூ ருளாரே. 

மான வாழ்க்கை அது உடையார்-மானமுள்ள பெருமையான வாழ்க்கையை உடையவர் சிவபெருமான் 

மலைந்தவர்-தம்மை எதிர்த்தவர் 

(வலியுடன் எதிர் பொரும் அசுரர்கள் பொடிபட மட்டித்திட்டு

உயர் கொக்கைக் குத்தி மலைந்த வீரா ...திருப்புகழ் )

மதிற்பரி சறுத்தார்- மதில்களை அழித்தார். (திரிபுரங்களை அழித்தவர் )

 தான வாழ்க்கை அது உடையவர்-தானங்கள் பல செய்கின்ற வாழ்க்கை உடையவர் 

தவத்தோடு நாம் புகழ்ந்தேத்த ஞான வாழ்க்கையது உடையார் -தவத்தின் மூலமாக வரும் ஞானமும் அடையப்பெற்றவர் 

நள்ளிருளில் மகளிர் நின்றேத்த வான வாழ்க்கை அது உடையார் வாழ்கொளி புத்தூருளாரே-

நள்ளிருளில் நட்டம் பயின்றாடும் நாதன் சிவபெருமான். அவருக்கு நள்ளிரவில் இன்னிசை கீதங்கள் பாடுகின்றனர் வானுலக மங்கையர். அவர்களின் புகழ்வான கீதங்களைக்கேட்டபடியே வானுலக வாழ்க்கையும் கொண்டவர் திருவாழ்கொளிபுத்தூரில் உள்ள ஈசனார். 

அவரைப்புகழ்ந்து ஏத்துவதால் நமக்கும் சிறப்பான மான, தான, ஞான, வான வாழ்க்கை அமையப்பெறலாம். (முற்றும்) 

எங்கிருந்து அழைத்தாலும் வருவார்- திருக்கழிப்பாலை நாயகர்

பால்வண்ணநாதர் வீற்றிருக்கும் இந்த திருக்கழிப்பாலைத்திருக்கோயில், ஆறாம் நூற்றாண்டுக்கு முன்னரிலிருந்தே இருந்துவந்திருக்கிறது. இப்போது கொள்ளிடம் இருக்கும் இடத்திற்கும், திருக்கழிப்பாலைக்கும் இடையே பதினோரு கிலோமீட்டர் தூரம் இருக்கிறது. முதலாம் இராஜஇராஜசோழனின் ஆட்சிக்காலத்தில், அணையாத நந்தா விளக்கெரிக்க நிவந்தம் இந்த கோயிலுக்குக் கொடுக்கப்பட்டதாக கல்வெட்டுகள் சொல்கின்றன. காலமாற்றத்தால், பலநூற்றாண்டுகளுக்கு முன்னர் இருந்த கட்டுமானம் சிதிலம் அடைந்து, பின்னர் கோயில் மீண்டும் எழுப்பப்பட்டிருக்கிறது. 

அப்பர் பெருமான் திருக்கழிப்பாலையில் ஐந்து பதிகங்களைப் பாடியுள்ளதால், அவர் இங்கு பலகாலம் தங்கியிருந்து உழவாரப்பணி செய்திருக்கக்கூடும். 

அப்பர் பெருமான், மணிவாசகப்பெருமான், பெரியாழ்வார் என்று பலரும் தங்களைப் பெண்ணாக பாவித்துப்பாடிய பாடல்கள் பல இருக்கின்றன. அப்பர் பெருமானின் அப்படிப்பட்ட ஒரு பாடல், எப்போதும் சமயச்சொற்பொழிவு செய்பவர்களால் அடிக்கடி எடுத்துக்காட்டப்படுகிறது. அந்த பாடல் முதலில் இந்தப்பதிவில் சிந்திப்பதற்கு உரியதாக இருக்கிறது.

முன்னம் அவனுடைய நாமம் கேட்டாள்;

    மூர்த்தி அவன் இருக்கும் வண்ணம் கேட்டாள்;

பின்னை அவனுடைய ஆரூர் கேட்டாள்;

         பெயர்த்தும் அவனுக்கே பிச்சி ஆனாள்;

அன்னையையும் அத்தனையும் அன்றே

    நீத்தாள்; அகன்றாள், அகலிடத்தார் ஆசாரத்தை;

தன்னை மறந்தாள்; தன் நாமம் கெட்டாள்;

         தலைப்பட்டாள், நங்கை தலைவன் தாளே! (06-25)

இந்த பாடல் ஆறாம் திருமுறை, அப்பர் பெருமான் திருவாரூரில் அருளியது.

தன்னை மறந்து, தன்னுடைய பெயர் கூட மறந்து,இறைவனின் தாள் பணியும் நங்கையாகத் தன்னைப்பாவிக்க நினைக்கும் எல்லாருக்கும் ஏற்றப்பாடல் இது.

இதைப்போன்ற மற்றொரு பாடல், திருக்கழிப்பாலைப்பற்றிய அப்பர் தேவாரத்தில் இருக்கிறது. 

ஊனப்பே ரொழிய வைத்தார்

ஓதியே யுணர வைத்தார்

ஞானப்பேர் நவில வைத்தார்

ஞானமு நடுவும் வைத்தார்

வானப்பே ராறு வைத்தார்

வைகுந்தற் காழி வைத்தார்

கானப்பேர் காதல் வைத்தார்

கழிப்பாலைச் சேர்ப்ப னாரே. (04-30)

பதம் பிரித்துப்படிக்க:

ஊனப்பேர் ஒழிய வைத்தார்

ஓதியே உணர வைத்தார்

ஞானப்பேர் நவில வைத்தார்

ஞானமும் நடுவும் வைத்தார்

வானப் பேராறு வைத்தார்

வைகுந்தற்கு ஆழி வைத்தார்

கானப்பேர் காதல் வைத்தார்

கழிப்பாலை சேர்ப்பனாரே. 

இன்றைய காலக்கட்டத்தில் வாழ்க்கை மிகவும் புறவயமாகிவருவதைப்பார்க்கிறோம். பிறக்கிற குழந்தைக்குப்பெயர் தேர்வு செய்வதில் தொடங்கி, பெயர் சூட்டுதல், சோறு ஊட்டுதல்  என்று அனைத்தும் இணையம் வழியாக விளம்பரப்படுத்தப்படுகின்றன. 

அப்பர் காட்டுவது அகவயமான மனப்பயிற்சி.பல நூற்றாண்டுகள் கடந்தாலும் அப்பரின் தேவாரங்கள், ஆலய வழிபாட்டு முறைகளுக்கும், நம் அகவயமான இறைத்தேடலுக்கும் வழிகாட்டுகின்றன.

இந்த பாடலின் முதல் நான்கு வரிகளும் சிந்திப்பதற்குரியன. எனக்குத்தெரிந்த ஒரு மத்திய வயதுடையவர்  எல்லாரிடமும் சிடுசிடுவென எரிந்து விழுவார்.அவருடைய உண்மையான பெயர் மறைந்து, அவர் இருந்த அடுக்ககக்குடியிருப்பில் "சிடுசிடு மாமா" என்ற புதிய பெயர் அவரது அடையாளம் ஆனது.

இன்னொரு மூதாட்டி தன் இளமைக்காலம் முதலாகவே கோயிலில் தினமும் எல்லா சன்னதிகளிலும் சுத்தம் செய்து, கோலம் போடுவதை ஒரு தொண்டாகச் செய்து வந்தார். சில நேரங்களில் சிவன் சன்னதியில் அமர்ந்து அவரோடு பேசுவதைப்போல அவரைப்பார்த்தபடி அமர்ந்திருப்பார். இந்த பாட்டிக்கு அவர் செய்த தொண்டே பெயராக ஆனது.- கோலப் பாட்டி.

நம்முடைய உண்மையான அடையாளம் என்ன? நம் ஊனுடலுக்கு உள்ளப்பெயரா? நமது படிப்பா? பார்க்கும் தொழிலா? கழிப்பாலை சேர்ப்பனாராகிய பால்வண்ணப்பெருமான், நமக்கு அவரின் பால் நிறம் போன்ற,  மனதை அருளி, நாம் கொண்ட ஊனப்பெயரை ஒழிய வைப்பார் என்கிறார் அப்பர் பெருமான். 

அப்பர் பெருமானைப்பல திருமுறை பயிலும் குழந்தைகள், அவர் கையில் வைத்திருக்கும் "தோசைத்திருப்பும் கரண்டி" போன்ற உழவாரம் என்ற கருவியை வைத்தே அடையாளம் காண்கிறார்கள். 

திருஞானசம்பந்தர்  "அப்பரே" என்று அழைத்தமையால்,அப்பருக்கு  அவருடைய மற்ற பெயர்கள் ஒழிந்தன. இன்றும் நாம் அவரை அப்பர் பெருமான் என்றே மனமுவந்து சொல்கிறோம்.

இறைவனை நோக்கி நம்முடைய எண்ணம் திரும்பினால், வாழ்க்கை எப்படி அர்த்தமுள்ளதாகும் என்பதை வாழ்ந்துக்காட்டியிருக்கிறார் அப்பர் பெருமான். 

அன்று இன்று போல மின்சாரம் இல்லை, தண்ணீர் வசதி இல்லை. ஒவ்வொரு ஆலயத்தையும் சுத்தம் செய்து, மக்களின் அறவாழ்வுக்கு அடிகோலினார் அப்பர் பெருமான்.

ஓதியே உணர வைத்தார்- ஐந்தெழுத்து மந்திரத்தை, மீண்டும் ஓதுவதாலும், சிவபெருமானைப்பற்றிய நூல்களைப்படிப்பதாலும், அவர் தம்மை உணர வைத்தார்.

ஞானப்பேர் நவில வைத்தார்- இறைவனைப்பற்றிய நினைவோடு தொடர்ந்து இருப்பதால் கிடைக்கும் ஞானம், இந்த உலகவாழ்க்கை எத்தனை நிலையில்லாதது என்பதையும், இறைவன் ஒருவரே பற்றிக்கொள்ளக்கிடைத்தவர் என்பதையும் தெளிவாக்கி, அந்த ஞானம் என்றும் தொடரும்படியாக, இறைவனின் பெயரைத் தொடர்ந்து நவில வைக்கும்.

ஞானமும் நடுவும் வைத்தார்:

மலர்மிசை ஏகினான் மாணடி சேர்ந்தார்

நிலமிசை நீடு வாழ்வார்

என்கிறது திருக்குறள்.

மலர்மிசை ஏகினான் என்பதற்கு, இறைவனை நினைத்துத்தொழும் அடியவர்களின் மனம் என்னும் தாமரையில் இறைவன் வீற்றிருக்கிறார் என்பது பொருள் ஆகும்.

அதைப்போல அப்பர் பெருமான் , தனக்குக்கிடைத்த ஞானம் என்ற பெருவுண்மையை வைக்க ஒரு பெட்டியைப்போல , இறைவன் தான் வீற்றிருக்கும் இதயக்கமலத்தைத்தந்தார் என்கிறார்.

வானப் பேராறான கங்கையையும் சடையில் வைத்தார்; திருமாலுக்குச் சக்கரம் தந்தார்.திருக்கானப்பேர் என்னும் தலத்தின் மீது காதல் கொண்டார் திருக்கழிப்பாலை நாதர்.

இது வரை அப்பரின் பதிகத்தைப்பார்த்தோம்.

அப்பர் பெருமான் பக்தி செய்யும் முறை ஒரு வகை. சுந்தரரின் பாங்கு, ஒரு நண்பனிடம் பழகுவதைப்போன்றது. 

பலரும் வாழ்க்கையில் நொந்துபோன காலக்கட்டங்களில், சொந்தங்கள் என்னைக்கைவிட்டன; ஆனால் நல்ல நண்பர்கள் உற்றத்துணையாக இருந்தார்கள் என்று சொல்லக் கேட்டிருக்கிறோம்.

உறுதுணையாக இருக்கும் நண்பர்கள், காலம், இடம், சூழ்நிலை என்று எதையும் கருத்தில் கொள்ளாமல், தன்னுடைய நண்பனின் கஷ்டத்தைப்போக்க ஓடோடி வருவார்கள். 

அப்படித்தான் சுந்தரரின் வாழ்க்கைக்கு, அவருடைய காதல், திருமணம், அவர் சந்தித்த சிக்கல்கள் என்று பலவற்றிலும் சிவபெருமான் சுந்தரருக்காக ஓடோடி வந்திருக்கிறார்.

சாக்குபோக்கு சொல்லாமல், எங்கிருந்து அழைத்தாலும் உடனே வருவார் என்கிறார் சுந்தரர்.

சிவபெருமான் நம்முடையத்தொடர்பு எல்லைக்குள் தான் இருக்கிறார். 

எங்கேனும் இருந்து உன் அடியேன் உனை நினைந்தால்

அங்கே வந்து என்னோடும் உடனாகி நின்றருளி

இங்கே என் வினையை அறுத்திட்டு எனை ஆளும்

கங்கா நாயகனே கழிப்பாலை மேயானே. (சுந்தரர் தேவாரம்-(07-23))

உலகத்தின் பல இடங்களில் இன்று தமிழர்கள் பரவி வாழ்கிறார்கள்.நினைத்த நேரத்தில், குடும்பத்தினரோடு, முகம் பார்த்து இணையவழி பேசமுடிகிறது என்றாலும், சில ஆண்டுகளுக்கு முந்தைய கோவிட் காலம் ஒவ்வொருவருக்கும்  ஓவ்வொரு விதமான நெருக்கடிகளைக் கொணர்ந்தது.இதுவரை அனுபவித்திராத பலத் துன்பங்களில் ஆட்படுத்தியது.

இன்றைய காலக்கட்டத்தில், வேலைக்குப்போகும் பலருக்கும், பொருளாதார சூழலால், வேலைபோகும் என்ற பயம் மனதில் எப்போதும் இருக்கிறது. 

நம்முடைய மனக்குழப்பங்கள் நீங்க நாமும் சுந்தரரைப்போல அழைப்போம் வாருங்கள். 

உலகில் எங்கேயிருந்து உன்னை நினைந்தாலும், அங்கே வந்து, என்னோடு உற்றத்துணையாய் உடனிருந்து, என்னுடைய துன்பமான வினைகளை அகற்றி, என்னுடைய மனத்துன்பங்களிலிருந்து விடுதலைப்பெற வைக்கும் நீயே, என்னை ஆளும் கங்கை நாயகா, கழிப்பாலையை  விரும்பித் தன் இடமாகக்கொண்டு வீற்றிருக்கும் இறைவா என்று தன்நண்பனைப் பரவுகிறார் சுந்தரமூர்த்தி நாயனார்.

மனமே முருகனின் மயில்வாகனம்- மயிலாடுதுறை தேவாரம் அறிவோம்

 தென்னக இசையின் தாயான காரைக்கால் அம்மையின் வழியாக தான் இந்தளம் என்ற பண் அறிமுகம் ஆனது. இந்தோள ராகமும் இதுவே.

இந்த ராகத்தில் அமைந்த மனமே முருகனின் மயில்வாகனம் என்ற திரையிசைப்பாடல், மயில் ஆடும் துறையைப்பற்றிய சிந்தனைகளைக் கொண்டு வந்தது.

அம்பிகை மயிலாகத்தவம் செய்த இரண்டு தலங்கள்- மயிலாப்பூர் (திருமயிலை) மற்றும் மயிலாடுதுறை.

திருமயிலை சென்னை நகரத்தின் மையப்பகுதியில் அமைந்துள்ளது.

மயிலாடுதுறை இப்போது மாவட்டத்தலைநகராக இருக்கிறது. பல பாடல் பெற்ற தலங்கள் அருகில் இருக்கின்றன. 

 அம்பிகை, தட்சனின் யாகத்துக்குச் சென்று, அவமானப்பட்டு, மயில் ரூபம் எடுத்து ஐப்பசி மாதம் முப்பது நாட்களும் தவமிருந்து எம்பெருமானை அடைந்த தலம் மயிலாடுதுறை. 

 

Picture Courtesy: Veludharan.blogspot.com

சோழன் பெருவிரைவு ரயில் மாயவரம் எனப்படும் மயிலாடுதுறையில் முன்னெல்லாம் பதினைந்து நிமிடங்களுக்கு மேல் நின்று செல்லும். இந்த ஊர் கோயிலுக்கு இது வரை செல்லும் வாய்ப்பு கிட்டவில்லை. 

இந்து சமயத்தைப்பொருத்தவரை குறியீடுகளின் வழி, பல தத்துவங்கள் சொல்லப்படுகின்றன. முருகனின் பின்னால் இருக்கும் மயில் மனதைக்குறிக்கிறது என்கிறார்கள். நம் மனம் தூய்மையாக இருந்தால் அது இறைவன் அமரும் வாகனம் ஆகும்.

அம்பிகை இறைவனின் இடப்புறம் இருந்து, இறைவனின் சரிபாதியாக, உணர்ச்சிகளைக்கொண்டு முடிவெடுப்பவளாக இருக்கிறாள்.எனவே அவள் உணர்ச்சிகள் தோன்றும் மனதின் உருவாக மயில் ரூபம் கொண்டாள் என்று நான் புரிந்துக்கொள்கிறேன். 

இந்த ஊரை அருணகிரிநாதர் பாடாமல் விட்டிருக்க வாய்ப்பில்லை.

திருப்புகழில் தேடியபோது, சிகண்டியூர் என்றார் அருணகிரியார்.

சிகண்டி என்றால் மயில். 

கந்தர் அலங்காரம் பாடல் 26

நீலச் சிகண்டியி லேறும் பிரானெந்த நேரத்திலுங்

   கோலக் குறத்தி யுடன்வரு வான்குரு நாதன்சொன்ன

      சீலத்தை மெள்ளத் தெளிந்தறி வார்சிவ யோகிகளே

         காலத்தை வென்றிருப்பார், மரிப் பார்வெறுங் கர்மிகளே

அருணகிரிநாதர் தன் உயிரை மாய்த்துக்கொள்ள நினைத்தபோது, முருகன் அவரை ஆட்கொண்டு உபதேசம் புரிந்தவற்றை, அவர் கந்தர் அலங்காரம் என்ற நூலில் எழுதியுள்ளார். எப்போது வேண்டுமானாலும் மயில் மீது முருகன் வள்ளியோடு வருவார். குருநாதனான அவர் சொன்ன உபதேசத்தைப்பின்பற்றுபவர் மட்டுமே காலம் கடந்து வாழ்வார்கள் என்கிறார் அருணகிரிப்பெருமான். 

மிகவும் பழமையான ஊர். காசிக்கு நிகராக சொல்லப்படும் ஊர்கள் திருவையாறு, திருவெண்காடு, திருவிடைமருதூர்,  திருவாஞ்சியம், சாய்க்காடு மற்றும் மயிலாடுதுறை. ஐப்பசி மாதம் முழுவதும், மயிலாடுதுறை காவிரியில் மூன்று தேவியரும், கங்கை, யமுனை, சரஸ்வதி ஆகிய நதிகளும் நீராடவருவது சிறப்பாகச் சொல்லப்படுகிறது. 

இங்குள்ள அம்பிகையின் பெயர் அபயாம்பிகை. அபிராமி அம்மைப்பதிகம் போல, இங்கு வாழ்ந்த நல்லதுக்குடி கிருஷ்ணஸ்வாமி என்பவர் எழுதிய அபயாம்பிகை பதிகம் யாருமில்லாத அவருக்கு, அம்பிகை அருள் செய்ததைக்காட்டுகிறது. 

பேச்சுவழக்கில் எல்லாருக்கும் இந்த ஊர் மாயவரம். வடமொழியில் மாயூரம். அப்பர், சம்பந்தர் தேவாரங்களில் மயிலாடுதுறை என்றிருப்பதைப்பார்த்து 1980ஆம் ஆண்டு பெயர் மாற்றம் செய்யப்பட்ட ஊர் இது. 

அப்பர் இறைவனின் திருவடி நிழலை விரும்பிப்பற்றியவர். எத்தனையோ துன்பங்கள் அவருடைய வாழ்க்கையில் வந்து சென்றன.தந்தைத்  தாயை சிறுவயதில் இழந்தது முதல், சூலை நோய் கொண்டு அவதிப்பட்டது, கடலில் கல்லைக்கட்டி இடப்பட்டது, சுண்ணாம்பு காளவாய் என்று சொல்லப்படும் சூடான அறையில் வைக்கப்பட்டது, மதம் கொண்ட யானையை எதிர்கொண்டது என்று பல உயிரைக்கூட விட்டுவைக்காத சோதனைகளை இறைவனின் பெருவருளால் தாண்டி வந்தார். 

நம்மில் பலருக்கு சோதனைகள் வரும்போது, இறைவன் இருக்கிறாரா என்ற கேள்வியும், ஏன் நான் மட்டும் அவதிப்படுகிறேன் என்ற கேள்வியும் வருவதுண்டு. 

ஏன் அப்பர் எல்லாரையும் போல சலித்துக்கொள்ளாமல், இறைவனின் திருவடியைப்பற்றினார் என்று யோசித்ததுண்டா? அது ஒன்றே வழி.  இன்றைய காலகட்டத்தில், பலரும் நேர்மறை எண்ணங்களைப்பற்றி சொல்கிறார்கள்.  (Power of Positive Thinking).

அப்பர் பெருமான் அன்று பூத்த மலர்களைக்கொண்டு அதிகாலையில் வழிபாடு செய்வதைப்பற்றி, பல தேவாரங்களில் குறிப்பிட்டிருப்பார். அவர் செய்த தொண்டால், தான் இன்றும் நமக்கு ஆலயங்களைத்தரிசிக்க முடிகிறது. 

மனதை மாற்ற சிலர் நெருக்கமானவர்களிடம் புலம்புவார்கள். சிலர் குடியைக்கையில் எடுப்பார்கள். ஆனால், இறைவனைப்பற்றுதலைப்போன்ற ஆறுதலும், நம்பிக்கையும் வேறு எதிலும் கிடைக்காது. 

ஐந்தாம் திருமுறையிலுள்ள மயிலாடுதுறை அப்பர் பெருமான் அருளிச் செய்த திருப்பதிகத்திலிருந்து சில பாடல்களைப்பார்ப்போம்.

நீற்றினான், நிமிர்புன்சடையான், விடை-

ஏற்றினான், நமை ஆள் உடையான், புலன்

மாற்றினான், மயிலாடுதுறை என்று

போற்றுவார்க்கும் உண்டோ, புவி வாழ்க்கையே.?

இந்த உலக வாழ்க்கை துன்பங்கள் நிறைந்தது தான். ஆனால் திருநீறு அணிந்து, நிமிர்ந்து நிற்கும் பொலிவான சடையுடையவனும், நந்தியைத் தன் வாகனமாகக்கொண்டவனும், என்னை ஆள்பவனும், என்னுடைய புலன்களை மடை மாற்றம் செய்தவனும் ஆனவன் மயிலாடுதுறையில் இருக்கும் சிவபெருமான். அவனைப்போற்றுவோருக்கு உலக வாழ்க்கையும், அதனால் உண்டாகும் துன்பங்களும் இல்லை என்கிறார் அப்பர் பெருமான். 

கோலும், புல்லும், ஒரு கையில் கூர்ச்சமும்,

தோலும், பூண்டு துயரம் உற்று என் பயன்?

நீல மா மயில் ஆடு துறையனே!

நூலும் வேண்டுமோ, நுண் உணர்ந்தோர்கட்கே?

இந்த பாடலில் அப்பர் சொல்லும் கோல் என்பது யோகதண்டம் எனப்படும் மூன்று பாகங்களாகப்பிரிந்த ஒரு கோல்.  புல் என்று அவர் சொல்வது தர்ப்பைப்புல்லைக்குறிக்கிறது. கூர்ச்சம் என்பது தர்ப்பைகளை சேர்த்துக்கட்டி வைக்கப்பட்டிருப்பதைக்குறிக்கிறது. பொதுவாக, கூர்ச்சம் இறைவனையோ, உயிரையோ எழுந்தருளச் செய்யப் பயன்படும் ஒன்றாகும். தோல் என்பது மான் தோலைக்குறிக்கிறது. பூணூல் அணியும் யாருக்கும், முதன்முதலாக அவர்கள் அணியும்போது அதில், மான் தோலின் சிறுபகுதி  சேர்க்கப்படும். அது அவர்களுக்கு தியானத்தின் மேல் நிலையை அடைய உதவும்.

இந்த மூன்றும் உடையவர்கள், இறைவனை உணர வேண்டும். அப்படி இல்லாமல், இந்த பொருட்களைக்கொண்டிருந்தும் துயரத்தோடு அவர்கள் இருந்தால், இந்த பொருட்களால் பயன் ஏதும் இல்லை. 

நீல மயில் உடைய மயில்கள் ஆடும் மயிலாடுதுறை ஈசனே,  மெய்ப்பொருளான உன்னை உணர்ந்தவர்களுக்கு, நூல் எனப்படும் முப்புரிநூல் வேண்டுமா? தேவை இருக்காது என்கிறார் அப்பர்.

மறைமுகமாக இறைவனை அடைய தூய மனமே வேண்டும் என்று சொல்கிறார் என்று நான் எடுத்துக்கொள்கிறேன். 

இதன் தொடர்பில் திருமந்திரத்திலும் இதே போன்ற ஒரு பாடல் இருக்கிறது. 

நூலும் சிகையும் உணரார்நின் மூடர்கள்

நூலது வேதாந்தம் நுண்சிகை ஞானமாம்

பாலொன்றும் அந்தணர் பார்ப்பார் பரம்உயிர்

ஓரொன் றிரண்டெனில் ஓங்காரம் ஓதிலே .

 

புறத்தோற்றத்தை மட்டும் வைத்துக்கொண்டு பலனில்லை. நூலும், சிகையும் தம்பால் பொருந்தப் பெற்ற அந்தணர்கள், பரமாத்மா ஜீவாத்மா  என்னும் இரண்டையும் நன்குணர்வர் எனில், அது வேதத்தை நன்கு ஓதி, வேதாந்தத்தை நன்கு உணரும் பொழுதே ஆகும்.

 இதுவே இந்த திருமந்திரப்பாடலுக்கான விளக்கம். 

அண்டர் வாழ்வும் அமர ரிருக்கையும்

கண்டு வீற்றிருக் குங்கருத் தொன்றிலோம்

வண்டு சேர்மயி லாடு துறையரன்

தொண்டர் பாதங்கள் சூடித் துதையிலே ((அப்பர் தேவாரம் மயிலாடுதுறை )

எது வாழ்வின் குறிக்கோள்? 

அண்டர் வாழ்வும்- தேவலோக வாழ்க்கையும் 

அமரர் இருக்கையும் - தேவலோக பதவிகளும்

கண்டு- அனுபவித்து

வீற்றிருக்கும் கருத்து ஒன்றிலோம்- அவற்றுக்கெல்லாம் தலைவனாக வீற்றிருக்க வேண்டும் என்ற எண்ணம் இல்லை.

வண்டு சேர்மயிலாடுதுறை அரன்- வண்டுகள் பல மொய்க்கும் பொழில்கள் உடைய மயிலாடுதுறையில் இருக்கும் சிவனின்

தொண்டர் பாதங்கள் சூடித் துதையிலே- தொண்டர்களின் பாதங்களை என் தலையில் சூடித் துதிப்பதே குறிக்கோள்

என்கிறார் அப்பர் பெருமான். பணிவு என்பதன் அடையாளமாக இருந்தவர் அப்பர் பெருமான். தொண்டு என்ற சொல்லுக்கும் பணிவு என்று பொருள் உண்டு. இறைவனின் தொண்டருக்குத்தொண்டராய் இருப்பதன் மூலம் வீடுபேறு கிடைக்கும், இந்த உலக வாழ்க்கையிலிருந்து நிரந்தர விடுதலை கிடைக்கும் எனபதால் அதுவே குறிக்கோள் என்கிறார் அப்பர் பெருமான். 

திருமுருகாற்றுப்படை- அறிவோம்- சங்க இலக்கியம் -01

 திருமுருகாற்றுப்படை என்பது பதினோராம் திருமுறையில் உள்ளது . கடைச்சங்ககாலப்புலவர் நக்கீரரால் எழுதப்பட்டது. 

சமீபத்தில் தமிழின் மூத்த எழுத்தாளர், திரு.நாஞ்சில் நாடன் அவர்கள் சங்க இலக்கியங்களைக்கற்பதால் கிடைக்கும் நன்மைகளைப்பற்றிப்பேசிய உரை என்னை வெகுவாகக்கவர்ந்தது. 

சென்ற பங்குனி உத்திரத்தில் சுமார் 350 வரிகளை உடைய திருமுருகாற்றுப்படையிலிருந்துத் தொடங்கலாம் என்று படித்துப்பார்த்தேன். 

யாழ்ப்பாணம் ஆறுமுகநாவலர் எழுதிய உரை, தமிழ் இணைய நூலகத்தில் கிடைக்கிறது. 

அதிலிருந்து நான் புரிந்துக்கொண்டவற்றை, எனக்கும் நினைவில் இருத்திக்கொள்ள ஒரு கற்றல் வாய்ப்பாக அமையும் என்று இங்கே பதிவிடுகிறேன். 

முதலில் திருமுருகாற்றுப்படை வந்த  கதையைப்பார்ப்போம். 

ஆங்கிலத்தில் "Being in the Right Place at the Right time".

என்று சொல்வது அலுவலக சூழலில் அதிகம் பயன்படுத்தப்படும் தொடர். பணி உயர்வு ஒருவருக்குக்கிடைக்கும் பட்சத்தில் அவர் சரியான இடத்தில்,சரியான நேரத்தில் இருந்தார் என்பார்கள். 

சங்கக்கால புலவர் நக்கீரர். அவர் ஒரு முறை இமயமலையை நோக்கிச்சென்றார். இன்று போல, பேருந்து, ரயில் வசதிகள், பயணம் அழைத்துச் செல்லும் முகவர்கள் என்று யாரும் இல்லாத காலம். இரண்டாயிரத்து ஐநூறு  ஆண்டுகளுக்கு முன்னால் நடந்தே பயணப்பட்டார்.

வழியில் ஒரு அடர்ந்தக்காட்டில் ஓர் ஆலமரமும் அதனருகே ஓர் ஆறும் இருந்தன. நக்கீரர், அங்கே குளித்துவிட்டு, அந்த மரத்தின் கரையில் சிவபூஜை செய்யத்தொடங்கினார். 

அவர் கண்கள் திறந்திருந்தன. ஒரு  பழுத்த இலை தண்ணீரில் பாதியும், தரையில் பாதியுமாக விழுந்தது. அவர் பார்த்தபோதே நீரிலிருந்த பாதி மீனாகவும், தரையிலிருந்த பாதி பறவையாகவும் மாறியது. ஒன்றை ஒன்று இழுக்க ஆரம்பித்தன. அதை வேடிக்கைப்பார்த்துக்கொண்டிருந்த நக்கீரருக்கு, தனது பூஜையில் கவனச்சிதறல் உண்டானது. 

இன்று நாம் கவனச்சிதறல் இல்லாத கணங்களே இல்லை என்னும் இடத்தில இருக்கிறோம். ஒருவரோடு பேசிக்கொண்டிருக்கும்போதே, நம் கண்கள் தொடுதிரையைப்பார்க்கின்றன.

அங்கு என்ன நடந்திருக்கும் என்று உங்களால் யூகிக்க முடிகிறதா? ஆம்!  

உடனே ஒரு பூதம் ஓடோடி வந்து நக்கீரரைக்கைது செய்து இழுத்துச் சென்றது. "நான் சிவபூஜையில் கவனம் இல்லாமல் இருந்தவர்களைக்  கைது செய்து, ஆயிரம் பேர் வரை  சேர்த்து,ஒரே நேரத்தில்  உண்ணலாம் என்று நினைத்திருந்தேன். நேற்று வரை 999 பேர் கிடைத்தனர். நீ தான் அந்த ஆயிரத்தில் ஒருவன். ஆயிரமாவது ஒருவன்!" என்றது பூதம். 

அந்த பூதம் குளிக்க சென்ற இடைவெளியில்,மற்ற கைதிகள் எல்லாரும் சேர்ந்து நக்கீரரைத்திட்ட ஆரம்பித்தனர். 

நக்கீரர், மற்றவர்களுக்கும் தனக்கும் வழி கிடைக்க, நம்பிக்கையோடு, நேர்மறை எண்ணத்தோடு பாடியதே திருமுருகாற்றுப்படை.

பாடியதோடு அந்த செயல் நிற்கவில்லை. அனைவரும் முருகப்பெருமானின் அருளால் விடுதலை பெற்றனர். 

இன்று நமக்கான மனவிடுதலைக்காக , நிம்மதிக்காக திருமுருகாற்றுப்படையை நாடலாம். அப்படி என்ன இருக்கிறது இந்த சிற்றிலக்கிய நூலில்? வாருங்கள். சேர்ந்தே அனுபவிப்போம். 

இந்த கதையில் அவர் சரியான நேரத்தில் சரியான இடத்தில் இருந்தாரா என்பதை  அவரவர் யோசனைக்கே விட்டுவிடுகிறேன். ஆனால், நேர்மறை எண்ணங்கள் இருந்தால், எல்லா இடமும் நல்ல இடம் தான். எல்லா நேரமும் இறைவனை நினைத்தால் விடுதலை கிடைக்கும் என்பதையே இந்த கதை சொல்கிறது.

முருகு என்றால் என்றும் இளமையான என்று பொருள். தலையில் நரை இல்லாத, இளமை அழகோடு என்றும் இருப்பவர் முருகப்பெருமான் அவருடைய ஆறு படைவீடுகளையும் பற்றி விரிவாகப்  பேசுகிறது திருமுருகாற்றுப்படை.

 முதல் தொடர் : 1-6 வரிகள் 

உலகம் உவப்ப வலனேர்பு திரிதரு

பலர்புகழ் ஞாயிறு கடற்கண் டாஅங்

கோவற இமைக்குஞ் சேண்விளங் கவிரொள

உ றுநர்த் தாங்கிய மதனுடை நோன்றாட்

செறுநர்த் தேய்த்த செல்லுறழ் தடக்கை (5)

மறுவில் கற்பின் வாணுதல் கணவன்

எனக்கு இந்த செய்யுளின் தொடக்கம் மிகவும் பிடித்தது. உலகம் என்று தொடங்குவதால் மட்டுமல்ல. இந்த பாடல் தொடங்கும்போதே, உலகின் இருளை நீக்கும் சூரியனோடு தொடங்குகிறது. 

உலகம் என்ற சொல் சங்க இலக்கியங்கள் முதல் கம்பராமாயணம் வரை, பலவற்றிலும் முதல் சொல்லாக, மங்கலச் சொல்லாகப்பயன்படுத்தப்பட்டிருக்கிறது. 

உலகம் உவப்ப- உலகத்தில் உள்ள உயிர்கள் மகிழுமாறு. சூரியனின் பூரண ஒளியை பல மாதங்களுக்குத் தொடர்ச்சியாய் அனுபவிக்காத பல ஐரோப்பிய தேசங்கள் இருக்கின்றன. இவற்றில் எல்லாம் நிறைய பேர் மனசோர்விற்கு ஆளாகி, தற்கொலைக்கூட செய்து கொள்கிறார்கள். உலகின் முதல் ஆதாரம் சூரியன். அந்த ஒளி இல்லையேல் நாம் இல்லை. எனவே சூரியனைப்போற்றியபடி, அதன் வருகையால் மகிழும் உயிர்களைச்சொல்லி ஆரம்பிக்கிறது திருமுருகாற்றுப்படை. 

ஏர்பு வலன் திரிதரு பலர் புகழ்

ஞாயிறு கடல் கண்டு ஆங்கு

ஏர்பு- எழுந்து, 

வலன் திரிதரு- சுற்றி வந்து

பலர்- பல சமயத்தவரும்

புகழ்- போற்றும்

ஞாயிறு- சூரியன்

கடல் கண்டு ஆங்கு- கடலில் தோன்றுவதைக்கண்டு 

ஓ அற - புற இருள், அக இருள் இரண்டும் அற்றுப்போகும்படி 

இமைக்கும் அவிர் ஒளி-  கண் இமைகளை மூடி மனத்தால் பார்ப்பவர்களுக்கு அவர்கள் மனதில் ஒளியாக விளங்கி (அக இருளைப் போக்குவதாகவும்) 

சேண் விளங்கு ஒளி - கண்ணினாலே பார்க்கின்றவர்களுக்கு தூரத்திலேயே தெரியும் ஒளியாக (புற இருளை நீக்குவதாகவும்)

இது வரை வெளிப்பார்வைக்கு சூரியனைச் சொல்வதாய்த்தோன்றும் பொருளிலும், முருகனை அர்த்தம் கொள்வதாக இவ்வரிகள் அமைந்துள்ளன. 

முருகனின் நிறம் இளம் சூரியனை ஒத்தது. ஞாயிறு கடற்கண்டாங்கு சேண்விளங்கொளி  என்னும் வாக்கியம் , நீல நிறமுடைய கடலின் மீது விளங்கும் சிவந்த நிறத்தையுடைய சூரியனை சொல்வதோடு, நீல மயிலின் மீது விளங்கும் செவ்வொளி போன்ற மேனியை உடைய முருகப்பெருமானையும் குறிக்கிறது.

உ றுநர்த் தாங்கிய மதனுடை நோன்றாள்-

யார் உறுநர்? உற்றவர்கள். அடியவர்கள். முருகனை நாடி அவரைத்துதிப்பவர்கள்.

மதனுடை- மதன் என்ற சொல்லுக்குத் தமிழில் பல பொருள்கள் இருக்கின்றன. செருக்கு, மன எழுச்சி போன்றவை அவற்றில் சில.

அவர்களைத் தாங்கும் மதனுடை , நோன்றாள்

பணை மருள் நோன்றாள் என்று ஒரு வரியை நெடுநல்வாடையில் பார்த்தேன்.

நோன்றாள் என்றால் வலிமையான தாள் (பாதங்கள்).நோன்மை+ தாள் - வலிமையான பாதங்கள் .

உ றுநர்த் தாங்கிய மதனுடை நோன்றாள்-

தன்னுடைய அடியவர்களை எப்படியும் தாங்க வேண்டும் என்ற மனஎழுச்சியோடு இருக்கும் முருகப்பெருமானின் வலிமையான திருவடிகள். 

செறுநர்த் தேய்த்த செல்லுறழ் தடக்கை- இன்றைய காலத் திரைப்படங்களில் ஒரு கதாநாயகன் குறைந்த பட்சம் இருபது பேரை அடிப்பதைப்பார்க்கிறோம். நம் கதாநாயகன் முருகப்பெருமான், அவரது கை எப்படிப்பட்டது? செறுநர்- பகைவர். தேய்த்த- அழித்த, அவர்களை வலிமை இழக்கச்செய்த

செல் உழர்- செல் என்ற தேடினால், இப்போது கிடைக்கும் பொருள், உயிரின் அலகு (Basic Unit of Life:Cell). அவ்வளவே. செல் என்ற சொல்லுக்கு மேகம் என்றும் இடி என்றும் பொருள் இருக்கின்றன. இங்கு சொல்லப்படும் பொருள் இடி போல விழுந்த அடியைக்கொடுத்த 

தடக்கை- தட என்றால் பெரிய. பெரிய கைகள். 

செறுநர்த் தேய்த்த செல்லுறழ் தடக்கை:பகைவர்களை அழிக்கும் இடி போன்ற அடிகளைக்கொடுக்கக்கூடிய பெரிய கைகளை உடைய முருகப்பெருமான் 

மறுவில் கற்பின் வாணுதல் கணவன்-

மறுவில் கற்பின்:

குற்றம் ஒன்றும் சொல்லமுடியாத உயரிய கற்புநெறியை உடைய தெய்வயானையின்  

வாணுதல்- வாள் +நுதல்- ஒளியை உடைய நெற்றியை உடைய தெய்வயானை

கணவன்- அவளுடைய கணவனான முருகப்பெருமான். 

எது பக்தியில் கற்பு? தான் வழிபடும் கடவுளைத் தன் வாழ்நாள் வரையிலும் விடாது தொடர்வது என்று ஆறுமுக நாவலர் தனது உரையில் சுட்டுகிறார். அப்படி முருகப்பெருமானை விடாது தொடரும் தெய்வயானையை நமக்கு உதாரணமாகக்காட்டுகிறார் நக்கீரர். 

எளிதாய்க்கற்கலாம் திருமுறை-விமர்சனம்- திரு.ஆர்.வி.எஸ்

வியாசபாரதம், ரமணர் பற்றிய கட்டுரைகள், எங்களூர் மன்னையின் வாழ்க்கையை விரித்துரைக்கும் ஹரித்ராநதி எனப்பலவும் எழுதிவரும் ஆர்.வி.எஸ் அவர்களின் விமர்சனமும் முகநூலில் உள்ளது.

அது இங்கே மீள்பதிவு :

நாலாயிர திவ்யப் பிரபந்தங்கள், தேவாரம் திருவாசகம் போன்ற திருமுறைகளின் மொழிச் செறிவும் அழகும் எப்போதும் வாசிப்பவர்களின் உள்ளத்தைக் கவர்பவை. இவை நம்மை “தமிழண்டா” என்று நெஞ்சு நிமிர்த்த வைப்பவை.

இறைத்தமிழின் செல்வாக்கினை நாம் பல நவீன தமிழ்ப் பாடல்களிலும் கட்டுரைகளிலும் கூட காணலாம். என் கடன் பணி செய்து கிடப்பதே என்ற அப்பரின் வாக்கு சகஜமாக தற்போதும் உரையாடல்களில் புழங்கும் வரி. சுடலைப் பொடி பூசியவனை ”என் உள்ளம் கவர் கள்வன்” என்று பாராட்டிப் பாடிய சம்பந்தரின் சொற்கள் இன்று வரை நம் மனதைக் கொள்ளை கொண்டு போகிறது. எண்பதுகளில் உள்ளம் கவர்ந்த கள்வன் என்றொரு திரைப்படம் (பாண்டியராஜன் நடித்தது) கூட வெளிவந்த ஞாபகம். ”நாமார்க்கும் குடியல்லோம் நமனை அஞ்சோம்” என்பது நாவுக்கரசர் தேவாரமாக முழங்கியது. ”எல்லோரும் இன்புற்றிருக்க நினைப்பதுவே அல்லாமல் வேறு ஒன்று அறியேன் பராபரமே!” என்ற ஸ்ரீதாயுமானவர் ஸ்வாமியின் திருவார்த்தைகள் இப்போது எதற்கு பிரசித்தி என்பது வாசிப்பவர்கள் அனைவரும் தெரிந்ததே!

திருமதி வித்யா அருண் மன்னார்குடிக்காரர். ஃபேஸ்புக்தான் எங்களின் உறவுப் பாலம். சிங்கையில் வசிக்கிறார். எங்கள் காவிரிக்கரைக்கே உரித்தான மொழி நேசம் இருப்பதோடு பாடல் பெற்ற திருமுறைத் தலங்கள் பல எங்கள் காவிரிக்கரையில் அமைந்திருப்பதினால் திருமுறையிலும் பேரார்வர்த்தோடு இருக்கிறார்.அனுதினமும் பத்து பக்கங்களாவது வாசிக்கும் பழக்கமுள்ள நான் சென்ற சில நாள்களாக அம்மாவின் தேக அசௌகரியத்தினால் எந்தவொருப் புத்தகத்தையும் தொடுவதற்குக்கூட நேரமில்லாமல் இருந்தேன். திருமுறைகளில் எனக்கிருக்கும் ஆர்வத்தைக் கண்டு திருமதி வித்யா அருண் தானெழுதி அகநாழிகை வெளியிட்ட “எளிதாய்க் கற்கலாம் திருமுறை” என்ற புத்தகத்தை பரிசாக அனுப்பியிருந்தார். நீண்ட இடைவெளிக்குப் பின்னர் (25-30 நாள்கள்) நான் படித்த புத்தகம் இது.

திருவான்மியூர் பண்ணிசைப் பாணர் மா. கோடிலிங்கம் ஐயாவிடம் முறையாக மூன்றாண்டுகள் திருமுறைக் கற்றிருக்கிறார் திருமதி வித்யா அருண். கர்நாடக சங்கீதம் அறிந்தவர்.

பதினோராம் திருமுறையில் அதிரா அடிகள் எழுதிய திருமும்மணிக்கோவையிலிருந்து புத்தகம் துவங்குகிறது. எதற்கும் மனம் தளராமல் இருக்க வேண்டும் என்பதற்காக விநாயகனை வேண்டும் இப்பாடலில் உந்தத் தளரா, சந்தத் தளரா என்று வரிக்கு வரி தளரா எழுதி மந்தத் தளரா மலர்ச்சரணங்கள் வாழ்த்துமினே என்கிறார் அதிரா அடிகள்.

தண்ணீர் உறிஞ்சாத நெட்டி போல இறைபக்தியை உறிஞ்சாத என் நெஞ்சினிலும் நீ நிறைந்தாயே என்று கருவூர்த் தேவர் உருகும் ஒன்பதாம் திருமுறைப் பாடலைக் கொடுத்திருப்பது இந்நூல் ஆசிரியரின் தெய்வ பக்தியையும் திருமுறையினை உள்வாங்கியிருக்கும் பாங்கினையும் காட்டுகிறது.

தருமபுரம் யாழ்முறிநாதர் கோயில் சைவநெறியைப் பின்பற்றும் அனைவரும் அறிந்த தலம். தனது நண்பரான திருநீலக்கண்ட யாழ்ப்பாணர் தனது யாழினால் மீட்டமுடியாத பண்ணை ஞானசம்பந்தப் பெருமான் இந்தத் தலத்தில் பாடியதாக வரலாறு. அந்தத் திருத்தலத்துப் பாடலான “மாதர் மடப்பிடியும் மட அன்னமும் அன்னதோர்...” இடம்பெற்றிருக்கிறது.

ஒன்பதாம் திருமுறை திருவிசைப்பாவில் கருவூரார் எழுதிய பெரியவா கருணை என்று தொடங்கும் பாடல் திருத்துறைப்பூண்டி அருகிலிருக்கும் திருச்சாட்டியக்குடி இறைவின் மீது பாடப்பெற்றது. வார்த்தைகளில் விளையாடிருக்கும் அப்பாடலில் இளநிலா எறிக்கும் பிறைதவழ் சடைமொழுப்பு அவிழ்ந்து என்ற வரிகளில் வரும் இளநிலா எண்பதுகளில் எழுதப்பட்ட இளையநிலா பொழிகிறதுக்கு பல நூற்றாண்டுகளுக்கு முன்னர் இயற்றப்பட்டது. பெரியவா கருணை என்று சேர்த்துப்படிக்கும் போது காஞ்சிப் பெரியவா ஞாபகம் நமக்கு வருவது போல இந் நூல் ஆசிரியருக்கும் வருவதில் ஆச்சரியமென்ன!!

மன்னார்குடியரான அவர் எங்கள் ஊர் பாமணி நாகநாதர் ஆலயத்தினைப் பற்றியும் இந்நூலில் எழுதியிருக்கிறார். பாதாளேச்வரம் என்றழக்கப்படும் தலத்தினை “வயல் சூழ்ந்த பாதாளே” என்று சம்பந்தர் பாடும்போது மன்னையின் மண்வளம் தெரிகிறது. சிவ வைணவ பேதமின்றி இந்தக் கட்டுரையில் எங்கள் கோபாலனின் திருப்படமும் இடம்பெற்றிருப்பது மகிழ்ச்சியளிக்கிறது.

புத்தகம் முழுக்க ஆங்காங்கே ஆழ்வார்களின் பாசுரங்களும், வள்ளலார், பட்டினத்தடிகள் ஆகியோரின் பாடல்களும் பாயசத்தில் மிதக்கும் முந்திரி போல திருக்குறள்களும் இடம்பெற்றிருக்கின்றன. பக்கங்களைத் திருப்பும் போதும் விரல்கள் உராயாமல் வழவழத் தாளில் அச்சிடப்பட்டிருக்கிறது. ஒவ்வொரு கட்டுரையிலும் அதில் சம்பந்தப்பட்ட பொருள்கள் மலர்கள் தெய்வங்கள் மனிதர்கள் ஆகியோரின் படங்களும் ஆங்காங்கே பொருத்தமாக இடம்பெற்றிருக்கின்றன. பொன் வாசுதேவனுக்கும் பாராட்டுகள்!

திருமதி வித்யா அருண் அவர்களின் முதல் நூலாம். இன்னும் நிறைய எழுத என் மனமார்ந்த

வாழ்த்துகள்

!

குறிப்பு: புத்தகத்தின் கடைசியில் இதில் இடம்பெற்றிருக்கும் பாடல்களை இணையத்திலும் படித்து ரசிக்கும்படியாக QR code கொடுத்திருப்பது புதுமை! மொபைலில் க்ளிக்கி படிக்கலாம்!

#வாசிப்பனுபவம்

#வரப்பெற்றேன்

#எளிதாய்க்_கற்கலாம்_திருமுறை

#அகநாழிகை

#வித்யா_அருண்

எளிதாய்க்கற்கலாம் திருமுறை புத்தகம் வெளியீடு

 திருமுறை ஆர்வலர்களுக்கு,

அன்பும் பணிவும் கலந்த வணக்கம். என்னுடைய முதல் நூல் எளிதாய்க்கற்கலாம் திருமுறை வெளியீடு கண்டுள்ளது.

தீநுண்மி சூழலில், எங்களால் விழா எடுக்க முடியாவிட்டாலும், சிங்கப்பூரில் உள்ள தமிழ் சான்றோர்கள், திரு.சுப.திண்ணப்பன் மற்றும், திரு.அ.கி.வரதராசன் அவர்களிடமும் வாழ்த்துப்பெற்றோம்.

ஸ்ரீ வீரமாகாளியம்மன் ஆலய ஓதுவார் திரு.சுந்தரமூர்த்தி அவர்களிடமும், எழுத்தாளர் திருமதி ஜெயந்தி சங்கர் அவர்கள் முன்னிலையில் ஆசி பெற்றோம்.

சிங்கப்பூரில் உள்ள ஓதுவாமூர்த்திகள் பலரும், இந்நூல் பல புதிய பாடல்களைக்கொண்டு அமைந்துள்ளதாக பாராட்டுதெரிவிக்கின்றனர்.

தமிழிலும், ஆங்கிலத்திலும் தொடர்ந்து இருபத்தைந்து ஆண்டுகளாக முத்திரை பதித்துள்ள எழுத்தாளர் ,திருமதி ஜெயந்தி சங்கர் அவர்கள் முகநூலில் பகிர்ந்த மதிப்புரை இதோ.

https://www.facebook.com/groups/437996733366658/posts/1257005834799073/?comment_id=1259101237922866&notif_id=1636632748196232&notif_t=group_comment&ref=notif

நான் பெரிதும் மதிக்கும் எழுத்தாளர் திரு.நாஞ்சில் நாடன் அவர்களும் இந்நூலுக்காக மதிப்புரை ஒன்றை வழங்கியுள்ளார்.

அதில் தமிழ் இலக்கிய சுவைக்காகவும் இந்நூல் நல்ல வாசிப்பு அனுபவம் என்ற தன் கருத்தைப்பதிந்துள்ளார் 

இந்நூலை வாங்க விருப்பமுள்ளவர்கள், இந்தியாவில் ,கீழ்க்கண்ட முகவரியைத்தொடர்புகொள்ள வேண்டுகிறேன்.

https://www.aganazhigai.com/shop/Elithai_Karkalam_Thirumurai/

சிங்கப்பூர் அல்லது மற்ற நாடுகளில் இருப்போர் என்னைத்தொடர்பு கொள்ளலாம். (Fb profile: Vidhya Krish) 

அன்புடன்

வித்யா அருண் 

ஆயிரத்தில் ஒருவன் -திருஆக்கூர் (தான்தோன்றி மாடம்)-சிறப்புலி நாயனார் புராணம்

 இகழ்ந்தெள்ளாது ஈவாரைக் காணின் மகிழ்ந்துள்ளம்

உள்ளுள் உவப்பது உடைத்து.(குறள்:1057)

இகழ்ந்து, கேலி செய்யாது, கொடுத்து உதவுபவரைக்கண்டால், உதவி கேட்பவரின் மனம் உள்ளுக்குள் மகிழும் என்கிறார் திருவள்ளுவர். 

மனதில் அருள் இருந்தால் மட்டுமே, இரப்பவரை கேலி செய்யாமல், அவர்கள் மனம் மகிழுமாறு உதவ முடியும். 

வாடிய பயிரை கண்டபோதெல்லாம் வாடினேன் என்று வள்ளலார் பெருமான் அருளுக்கு உருவம் ஆனார். 

இன்றைய கொரோனா பெருந்தொற்று காலத்தில் பலருக்கும் பல வித துன்பங்கள்!.

 நிறைய பேர் வேலை இழக்கின்றனர். தானத்தில் பெரிதாய் சொல்லப்படும் அன்னதானத்தை முடிந்தவர்கள் மனமுவந்து செய்யவேண்டியது இப்போது தான். 

இறைவனுக்கு பால், தயிர், மஞ்சள், தேன்,சந்தனம், இளநீர், விபூதி போன்ற திரவியங்கள் அபிஷேகத்திற்கு பயன்படுத்தப்படுகின்றன. ஆனால் இவை எல்லாவற்றிலும் சிறப்பானது ஐப்பசி பௌர்ணமி நாளில் செய்யப்படும் அன்னாபிஷேகம். 

அன்னம் பரப்பிரம்மம் . ஒருவர் என்ன வகையான உணவை சாப்பிடுகிறாரோ, அதைக்கொண்டு, அவர்களின் குணநலன்கள் இருக்கும் என்று ஸ்ரீமத் பகவத் கீதையிலும் சொல்லப்பட்டிருக்கிறது. 

தான்தோன்றி என்ற சொல் இலங்கை போன்ற நாடுகளில், தானாக மனம் போன போக்கில் நடப்பவரைக்  குறிப்பிடும் சொல்லாக இன்றைய நாளில் இருக்கிறது. முகக்கவசம் அணியாமல் தான்தோன்றியாய் அலைகிறார்கள் என்று திட்டுகிறார்கள்.

தான் தோன்றி என்ற சொல் மறைந்து இன்றைய தமிழக நாளிதழ்கள் பரவலாக சுயம்பு என்ற சொல்லைப் பயன்படுத்துகின்றன.

சுயம்பு என்ற சொல் வடமொழி மூலம் கொண்டது. தான் தோன்றி என்ற சொல்லே தமிழ் மூலம் உடையது.

தமிழ்நாட்டைப் பொருத்தவரை தானாக தோன்றி  சுயம்புவாக இறைவன் காட்சியளித்த தலங்கள் பல இருக்கின்றன. அவற்றில், உறையூர் தான்தோன்றிநாதர் கோயில், கரூர் பக்கத்திலிருக்கும் வைணவ ஆலயமான தான்தோன்றிமலை, மற்றும் திரு ஆக்கூர் எனப்படும் தான்தோன்றிமாடத்தில் இருக்கும் சிவாலயம் போன்றவையும் அடங்கும்.

தான்தோன்றிமாடம் எனப்படும் திருஆக்கூரின் சிறப்பு, இங்கு அரசர் ஒருவர் ஆயிரம் பேருக்கு செய்த அன்னதானத்தில், ஒருவர் குறைவாக இருக்க, ஆயிரமாவது நபராக- ஆயிரத்தில் ஒருவராக, சிவபெருமான் வந்து உணவருந்தினார். இன்றும் உற்சவருக்கான திருநாமம் ஆயிரத்தில் ஒருவன்;கையில் கோலேந்தி நிற்கிறார்.

  

மாடக்கோயில்கள் என்னும் வகையான கோயில்கள் தமிழகத்திலுள்ள பலவகையான கோயில்களில் ஒரு வகை.

மாடக்கோயில் மற்றும் கரக்கோயில் :

(உள்படம்: திருக்கடம்பூர் ஆலயம் )

தேர் போன்ற அமைப்புள்ள கருவறை உள்ள கடம்பூர் கரக்கோயில் வகையை சார்ந்தவை. 

மாடக்கோயில் என்பது யானை ஏறமுடியாத வகையில் படிக்கட்டுகளோடு அமைந்த கருவறைக்கொண்டவை.

குடவாசல், அம்பர்மாகாளம், திருமருகல், திருஆக்கூர் எனப்படும் தான்தோன்றிமாடம் போன்றக் கோயில்கள் மாடக்கோயில் வகையை சேர்ந்தவை. 

Attribution: Ssriram mt, CC BY-SA 4.0 <https://creativecommons.org/licenses/by-sa/4.0>, via Wikimedia Commons for the picture of Kudavasal

நாம் இந்தப்பதிவில் பார்க்கப்போவது திருஆக்கூர் என்னும் தான்தோன்றிமாடம் பற்றிய பாடல்களைத்தான்!

அறுபத்துமூன்று நாயன்மார்களில் ஒருவரான கோச்செங்கணான் என்னும் மன்னன் எழுப்பிய 64 மாடக்கோயில்களில் ஒன்று திருஆக்கூர் எனப்படும் தான்தோன்றி மாடத்தில் அமைந்துள்ள சிவாலயம் ஆகும்.

சிறப்புலி நாயனாரின் ஊர் திருஆக்கூர்.

 இந்தப்பதிவில் ,பெரியபுராணத்தில் வரும் சிறப்புலி நாயனார் பற்றிய பாடல்களைப் படித்து உணரப்போகிறோம். 

சிறப்புலி நாயனாரைப் பற்றி பெரியபுராணத்தில் ஆறு பாடல்கள் இருக்கின்றன. சிறப்புலி நாயனார், சிவனடியார்களுக்கு அமுதூட்டும் தொண்டினைத்  தன் வாழ்நாள் முழுவதும் செம்மையாகச் செய்தார். 

சிறப்புலி நாயனார், 63 நாயன்மார்  வரிசையில் முப்பத்தைந்தாவது நாயன்மார். இவருக்கு அடுத்து வருபவர், பிள்ளைக்கறியோடு திருஅமுதுபடைத்த சிறுத்தொண்ட நாயனார் என்பது குறிப்பிடத்தக்கது 

சிவபெருமானின் திருவடியைக்காண விளமல் செல்வோம்!

 

நாம் எல்லாரும் பரவலாக அறிந்த எழுத்தாளர் திரு.கோமல் ஸ்வாமிநாதன். எனக்கு விளமல் என்ற ஊரின் பெயரைக் கேட்டதும் கோமல் ஞாபகம் வந்தது. இரண்டு ஊர்களுமே திருவாரூர் அருகில் இருக்கின்றன. 

பதஞ்சலி மனோஹரர் கோயில்,விளமல்

இந்த கோயில் திருவாரூரிலிருந்து மூன்று கிலோமீட்டர் தூரத்தில் உள்ளது. 

இம்மையே உம்மை சிக்கென்னப்பிடித்தேன் என்று மாணிக்கவாசகர் ஈசனின் திருவடியைத்தான் பற்றினார். இறைவனின் திருவடிப்பெருமையை நமக்கு உணர்த்தும் தலம் விளமல். 

பதஞ்சலி என்பது இன்றைய அளவில் வர்த்தகபெயராக  பலரும் அறிந்த ஒரு பெயர். பதஞ்சலி முனிவர் யோக சூத்திரத்தை எழுதியவர் .பாதி உடலில் பாம்பின் உருவம் கொண்டவர்.

நந்தி அருள்பெற்ற நாதரை நாடிடின்

நந்திகள் நால்வர் சிவயோக மாமுனி

மன்று தொழுத பதஞ்சலி வியாக்ரமர்

என்றிவர் என்னோ டெண்மரு மாமே.  

இந்த திருமந்திரத்தில் திருமூலர், தம்மோடு சேர்த்து, சிவபெருமானின் (நந்தியின்) அருள் பெற்ற நால்வரான சனகர், சனந்தனர், சனாதனர் , சனற்குமாரர், சிவயோக முனிவர் பதஞ்சலி முனிவர் மற்றும் வியாக்கிரபாத முனிவர் ஆகிய எட்டுப்பேரையும் குறிப்பிடுகிறார். 

சிதம்பரம் கோயில்- தில்லை, ஆதித்தலமாக போற்றப்படுவதாகும்.

சிதம்பரம் கோயில், பதஞ்சலி முனிவரும்,வியாக்கிரபாத  முனிவரும் ஆனந்த தாண்டவத்தைக் காண தவம் செய்ததால், அவர்களுக்கு சிவபெருமான் ஆனந்த தாண்டவத்தைக்காட்டி அருளிய தலம் . 

அதே போல  அஜபா நடனமும், திருவடித்தரிசனமும் அவர்கள் இருவரும் வேண்ட, அஜபா நடனத்தை அவர்கள் இருவருக்கும் திருவாரூரில் காட்டி அருளினார்.

பதஞ்சலி முனிவர், மண்ணால் ஆன சிவலிங்கத்தைப்பிடித்து விளமல் தலத்தில் வழிபட்டதால், அவர் பெயரோடு சேர்த்து, பதஞ்சலி மனோஹரர் என்று இறைவனும் அழைக்கப்படுகிறார். 

இந்த விளமல் தலத்தில் ,  பதஞ்சலி முனிவரும், வியாக்கிரபாத முனிவரும் திருவடித்தரிசனம் அருளப்பெற்றனர். 

இங்கு கோயில் கொண்டிருக்கும் அம்மையின் பெயர் மதுரபாஷினி . இன்றும் வாய்ப்பேச்சு வராத குழந்தைகளுக்காக பிரார்த்தனை செய்துகொள்ளும் கோயிலாகவும் இந்த கோயில் இருக்கிறது. 

திருஞானசம்பந்த பெருமான் விளமல் திருப்பதிகத்தில்,  இறைவனின் திருவடியைப் பற்றிப் பாடுகிறார். 

அந்தப்பதிகத்தின் பாடல்கள் சிலவற்றைத்தான் இந்தப்பதிவில் பார்க்கப்போகிறோம்.

மத்தக மணிபெற மலர்வதொர்

  மதிபுரை நுதல்கரம்

ஒத்தக நகமணி மிளிர்வதொர்

  அரவினர் ஒளிகிளர்

அத்தக வடிதொழ அருள்பெறு

  கண்ணொடும் உமையவள்

வித்தகர் உறைவது விரிபொழில்

  வளநகர் விளமரே.  (03-088)

அருள்பெறு கண்ணோடும் உமையவள் -அருளை பொழிபவள் அம்பிகை, அருள் நிறைந்த கண்களை உடையவள். அடியவரின் துயரம் பொறுக்காது, அருள் செய்பவள் 

வித்தகர்- வித்தகர்- ஞானம் உடையவர்,சிவபெருமான். பல திருப்புகழ்களில் அருணகிரிநாதரும் வித்தகா என்று முருகப்பெருமானைப் போற்றியுள்ளார்.  வித்தகா என்ற சொல் ஞானமூர்த்தி என்ற பொருளில் பயன்படுத்தப்பட்டுள்ளது. 

உறைவது விரிபொழில்

  வளநகர் விளமரே-அம்பிகையும் சிவபெருமானும் உறைகின்ற விரிந்த சோலைகள் சூழ்ந்த வளமான நகர் விளமல் 

மத்தகம் அணி (அழகு) பெற,  -மத்தகம் என்ற சொல்லை , யானையின் நெற்றிக்கு தான் இப்போது பயன்படுத்துகிறோம். 

அண்மையில் எழுத்தாளர் ஜெயமோகன் அவர்கள் எழுதிய குறுநாவல் ஒன்றின் பெயர் மத்தகம் .

மத்தகம் என்பது சிவபெருமான் தலையின் மேல் என்ற பொருளில் இந்த பதிகத்தில் பயன்படுத்தப்பட்டுள்ளது. அந்த தலையின் முகப்புப்பகுதிக்கு அழகு சேர்க்குமாறு,

மலர்வது ஓர் மதி -ஒரு பிறை சந்திரன் மலர்ந்திருக்கிறது. பூவைப்போல, மதியை மலர்ந்திருக்கிறது என்று சொல்கிறார் சம்பந்தப்பெருமான்.

புரை நுதல்-புரை (ஒத்த)- நுதல் (நெற்றி)- இந்த நெற்றி அழகுக்கு அந்த நெற்றியைத்தவிர ஈடாக சொல்வதற்கு ஒன்றும் இல்லை. 

நகமணி ஒத்தக-கரங்களில் உள்ள நகங்களைப்போல 

  மிளிர்வதொர்

  அரவினர் -ரத்தினங்களை வாயில் கொண்ட ஐந்து தலை நாகத்தை 

ஒளிகிளர் கரம்-ரத்தினங்களின் ஒளி மிளிர்கின்ற பாம்பினைத்தன். தன் கையில் கங்கணமாகச்சூடியிருப்பவர் சிவபெருமான்.

அத்தக வடிதொழ- அவரின் மேலான திருவடியைத்தொழ, நாம் விளமலுக்குச் செல்வோம் 

அதே பதிகத்தின் மற்றொரு பாடல் :

பண்டலை மழலைசெய் யாழென

  மொழியுமை பாகமாக்

கொண்டலை குரைகழ லடிதொழு

  மவர்வினை குறுகிலர்

விண்டலை யமரர்கள் துதிசெய

  அருள்புரி விறலினர்

வெண்டலை பலிகொளும் விமலர்தம்

  வளநகர் விளமரே.

இந்தப்பாடல் சொல்வது சிவபெருமான் அடியவர்களை வினைகள் சாராது என்னும் நம்பிக்கை மொழி. 

பண்டலை மழலைசெய் யாழென

  மொழியுமை பாகமாக்

கொண்டு 

பண் தலை மழலை செய் யாழ் என மொழி உமை பாகமாக கொண்டு-

சிலர் பேசுவதே பாடுவதைப்போல இருக்கும். உமை அம்மையின் பேச்சு, பண்ணோடு கூடிய இசை மழலையாக இருக்கிறது. அது யாழின் இனிமையை ஒத்ததாக இருக்கிறது. இத்தனை இனிமையான பேச்சுமொழியைக்கொண்ட உமையவளைத்தன் உடலில் ஒரு பாகமாகக்கொண்டவர் சிவபெருமான் .

அலை குரைகழ லடிதொழு

  மவர்வினை குறுகிலர்-அலை (அசைகின்ற), குரை (ஒலிக்கும்), கழலடி தொழும் ,அவர் வினை குறுகிலர்.

வீரக்கழல் அணிந்திருக்கும் சிவபெருமானின் திருவடியைத்தொழுபவர்க்கு வினைகள் சாராது. 

விண்டலை யமரர்கள் துதிசெய

  அருள்புரி விறலினர்- விண் தலை அமரர்கள் (தேவர்கள்),துதி செய்ய அவர்களுக்கு அருள்செய்யும் விறலினர் (அருட்பெருக்கோடு கூடிய வலிமை உடையவர்) சிவபெருமான். 

வெண்டலை பலிகொளும் விமலர்தம்

  வளநகர் விளமரே."பிரம்மன் தலையாம் ஓடுடையார் " என்று திருக்கழிப்பாலை தேவாரத்தில் ஒரு வரி வரும். அதே தான் இங்கும் சொல்லப்படுவது. 

பிரம்மன் தலையை ஓடாகக்கொண்டு , வீடுகள் தோறும் பலி ஏற்றவர் சிவபெருமான். 

விமலர்- பாசம் என்னும் பற்று நீக்கியவர்; தெளிவானவர். அந்த விமலனாகிய சிவபெருமான் வீற்றிருப்பது, வளநகராகிய விளமல் ஆகும். 

அந்த சிவபெருமானின் திருவடியைத்தொழ தொழ, நமக்கும் மனதில்  தெளிவு பிறக்கும், வினைகள் நம்மை வந்து சேராது. 

இந்தக்கோயில் பற்றிய மேல் விவரங்களுக்கு, திரு.வேலுதரன் அவர்களின் இணையப்பக்கத்தையும் கொடுத்துள்ளேன் 

https://veludharan.blogspot.com/2021/03/vilamal-patanjali-manohar-temple.html